ترايفل كنافة بالمانجو

المقادير
200 x جرام قشطة
4 x عدد مانجة (مقطعة مكعبات صغيرة)
3 x كوب كريمة مخفوقة (ومحلاة)
¾ x كوب سمن (ذائبة)
½ x كيلو كنافة (مفرومة)

مقادير شربات السكر
1 x كوب ماء
2 x كوب سكر
2 x معلقة صغيرة ماء زهر
2 x معلقة صغيرة عصير ليمون

الخطوات
أول حاجة هنفرك الكنافة كويس فى صينية ونخلطها بالسمنة ونحمصها فى الفرن أو فى طاسة على البوتجاز لحد ما تتحول للون الذهبى ونسيبها على جنب.
هنحضر شربات السكر بس هنضيف عليه قشر المانجه كله.
فى حلة على النار هنضيف الماء والسكر ونقلبهم كويس لحد ما الماء يغلى ولمدة 10 دقائق.
لو ظهرت على سطح الماء أى رغوة هنشيلها بالمعلقة.
هنضيف عصير الليمون ونقلب كويس ويترك الخليط على النار حوالى 10 دقائق أو لحد ما الصوص يتقل وبعدين يرفع من على النار ويضاف ماء الزهر ويترك ليبرد
فى بولة هنضيف الكريمة المخفوقة المحلاة ونضيف عليها القشطة بالتدريج وعلى مراحل مع التقليب بعد كل مرحلة بمضرب بيض ومهم جدا تكون القشطة فى درجة حرارة الغرفة.
فى طبق تقديم غويط هنضيف نصف كمية الكنافة كطبقة أولى ونوزعها كويس ونسقيها بشربات السكر, وعليها هنضيف نصف كمية المانجة وبعدين هنضيف طبقة من الكريمة بالقشطة.
هنكرر العملية بإضافة طبقة من الكنافة هنوزعها بحرص ونسقيها بالشربات باستخدام معلقة وبعدين هنضيف باقى كمية المانجو.
بالنسبة للطبقة الأخيرة من الكريمة ممكن نضيفها بمكبس كريمة لعمل شكل جمالى ونرشها بفستق مطحون.. وبالهنا والشفا