إحتار القلب وإحتارت العيون

احتار القلب واحتارت العيون ..
تاه الدليل صرنا حكاية مروية..
تدور الأيام ونضل نودع كانون ..
تعدي الليالي وتمرّ الشتوية ..
حسرة عليك يا شعب بلادي المطعون ..
ما لقيت مداوي أو عشبة بريّة ..
ضاع الوطن يا يما باسم القانون ..
. ضاعت حقوق الإنسان الشرعية ..
نسيوا المواجع نسيوا الأقصى المحزون..
هانت عليهم الأرض القدسية ..
مات السلام واستشهد غصن الزيتون..
صاح الحمام وين النخوة العربية ..
يا فلسطين حبك في القلب مكنون..
يا بلادي عمره الدم ما يصير ميه ..
نقلع الشوك نزرع الأرض دحنون..
نسرج الخيل نمشي بضو الصبحية ..
نحلف يمين ولي بدو يكون يكون..
غير الجهاد ما بيحل القضية ..

من التراث الفلسطيني