• لإرسال مواد لموقع بقجة على البريد الإلكتروني: [email protected]

    ” آه يا زمن” بقلم زهير دعيم

    آه منك يا زمن
    عَضّيتنا بنابَكْ
    وقفّلت في وجوهنا بوابك
    ورميتنا خلف الجبالْ
    بلا هوّية ، بلا موّالْ
    عَ دروب لا هي دروبْ
    والسّما معكّرة
    والقمر معصوبْ
    ونجوم عم تبكي
    عَ شي حلم بيذوبْ
    +++
    لا تتعب يا قمر
    بتنادي ما في حدا
    صار الاخو بهالايام
    لخيّو عِدا
    وتفرّقت القلوب
    والمصلحة دين صرنا بنعبدو
    بنحرق ارواحنا بخور
    جوّا معبدو
    +++
    آه منك يا زمن
    وين أيام الهنا
    وين طلاتو ؟
    وين الطّابون الحلو
    وين خبزاتو ؟
    والابريق على الاسكملة
    تغنّي ميّاتو !!
    +++
    ما أحلى القعدة سوا
    بليلة ربيعية
    والربّ حامي الحِمى
    ليْليّة ، ليلية
    بيسهر علينا من فوق
    بنظرة حميميّة
    +++
    يلّلا نرنّم ونحبّ
    صبحيّة وعصرية
    تتعود البلد من جديد
    بالإيمان مضوية

    لإرسال مواد لموقع بقجة على البريد الإلكتروني: [email protected]

    اترك تعليقاً

    لن يتم نشر عنوان بريدك الإلكتروني.